ЈПКД „Комуналец“ и Општина Струмица викендов почнаа заедничка акција за чистење на големи диви депонии. Повеќе од сто депонии во општина Струмица треба да се исчистат во следниот период до почетокот на летото. Со реализирањети на оваа акција се очекува да се соберат околу 600 кубни метри отпад. Во чистењето на депониите се вклучени четири машини за товарење на отпадот и 12 камиони. Се чистеа дивите депонии до патот Струмица-село Вељуса, кај селото Водоча, на влезот во село Просениково и кај гробиштата во село Добрејци. Локациите на кои што се работеше, ги посетија градоначалникот Коста Јаневски и директорот на ЈПКД „Комуналец“, Зоран Горгиев.
-Сведоци сме на една грда слика која што нашата општина ја оптеретува со голем проблем и мислам дека и она што го гледаме и знаеме не мотивираше уште еднаш како и минатата гопдина, а сега со уште поголем интензитет и поголем желба, да се исчисти уште потемелно, работиме на повеќе локации, всушност на сите локации кои што сме ги лоцирале како диви депонии во нашата општина. Ова е една прилично опсежна акција во која се ангажирани човечки ресурси и механизација. Јас би сакал да апелирам, по незнам кој пат, до нашите сограѓани да внимаваат како се однесуваат кон природата и средината во која што живееме. Им се заблагодарувам на градежните фирми кои несебично и со големо разбирање се вклучија во акцијата. Ангажирани се десетина камиони и 5 возила за товарање на отпадот без кои оваа акција би била невозможна, секако и Јавното претпријатие „Комуналец“ максимално се ангажира, но не располагаат со таква оператива за да можат сами да реализираат една ваква акција. Замолувам, ако има луѓе кои сакаат да го дадат својот придонес и да се вклучат во оваа акција, да го направат тоа, бидејќи ова е акција во која секој е добредојден. Ова е голема акција и ниеден субјект сам, индивидуално не може да ја реши. Еве јас ги повикувам сите кои што имаат било каква механизација или превозно средство кое е адекватно за оваа работа, да се пријават во јавното претпријатие „Комуналец“, истовремено апелирам и до сите граѓани да се вклучат, секој на свој начин. Ова ќе биде акција не само за чистење на дивите депонии, туку и една поголема кампања која општина Струмица ја замисли и во однос на едукацијата на нашиот народ и потсетување за начинот на кој треба да се однесуваме кон природата. Една кампања кон нашите помлади генерации, кои верувам дека имаат поголемо чувство за чиста животна средина отколку, за жал, ние повозрасните. Денеска започнавме во населените места Просениково, Добрејци и Водоча и продолжуваме во следните денови со сите други депонии кои ги лоциравме, рече градоначалникот Јаневски.
